الجمعة، 19 مارس 2010

ليه حياتنا ماتكونتش ابسط من كده ؟؟




ليه حياتنا ماتكونتش ابسط من كده ؟؟


السلام عليكم .... كيفكم احبائي ؟؟ اتمني ان تكونو في احسن حال ...

مش عارفه بصراحه ابدأ منين .. بس فعلا ضغوطات الحياة خلتني افكر في الموضوع ده .... ليه دايماً بنكلكع الامور علي نفسنا ؟؟ رغم انها ممكن تكون بسيطة بس محتاجه ذكاء في التعامل ...

تلاقي البيت كله دوشة ووش .. رغم انه المفروض يكون موضع راحه وسكينه ...... الام تزعق لبنتها عشان ماجبتش درجه كويسه مثلا ... طيب فيها ايه لو كلمتيها باسلوب ارقي من كده ؟؟؟ هتفرق كتير جداً وهتلاحظي ده .. انما دايما جانب العنف هو المعروف لدينا ...

حصلت مشكلة كبيرة لا قدر الله .... استعن بالله واصبر .. هتتعصب مش هتلاقي نتيجة غير انك هتتعب ...هو ليه اكتر الدول المصابة بالضغط والسكر هي مصر ؟؟؟ يا عيني من كتر النرفذة والعصبية بتاعه الشعب .... اكيد فيه اسباب تانيه .. بس دول اهم الاسباب ...والمشكلة اننا مش بنتعلم ...دايماً نصرّ ع الزعيق والنرفذة ....في اوروبا بل في الدول المتقدمة من اسيا .. لا يصح ان يتخانق الابوان امام الاولاد الصغار ... عشان عندهم بيحترموا شخصية الابناء وبيحافظوا علي تربيتهم باسلوب صح وسليم ....

حاولوا تفكروا في الموضوع ده ..

 بجد حاولوا تلم شمل الاسرة ....
عجبتني فكرة كتير حلوة ..عمو صاحب بابا بيعملها ...

انه بيجمع العائلة كلها ( تقريبا 7 أعمام و6 عمات ) في أول جمعه من كل شهر عربي .. فيبيته ...بيحافظ علي صلة الرحم وفي نفس الوقت بيبقي فيه فرصه انهم يقعدوا وياكلوا ويقربوا من بعض اكتر .... وده حاجه رسميه من كل شهر عربي ... ده غير بقي الاعياد والمناسبات الخاصة .. بجد حاجه كتير جميلة ...حتي الاولد هينهجوا نفس المنهاج .. وهيفضلوا يتواصلوا مع بعض زي ما كان ابائهم بيعملوا ...

ياريت بجد نحاول نقرب من بعض اكتر .. مش هتخسر حاجه لو قعدت مع اخوك او اختك تفتح معاه او معاها الكتاب ...هيحس انك بتهتم بيه .. وياسلام لو حفظته حاجه كانت صعبه عليه .. . انت هتاخد ثواب .. وهو عمره ما هينسالك الموقف ده ...

ونصيحة لوجه الله .. إياك والتكشييييييييييييييير .... خلي ابتسامتك الجميلة علامة ليك .....تصدق انهم عملوا احصائيات في محل الناس فيه بتبتسم للزبائن وبتتعامل معهم بذوق .. وناس تانيه طول النهار مكشرة ومبوذه ..
وجدوا ان المحل اللي اصحابه بيبتسموا للزبائن انه بيكسب 5 اضعاف من المحل اللي اصحابه طول النهار مخنوقين ومكشرين في التعامل مع الزباين

يارب تكون رسالتي وصلت .... ساعتها وانت في الشغل او الكلية او المدرسة هتشتاق انك ترجع لبيتك .. المكان اللي هتجد فيه سعادتك وراحه بالك ( مش النكد والزعل ) ...

ويلا بقي مش هطول عليكم .... دعواتكم :)